جامعہ ملیہ اسلامیہ میں آج سوشل ڈسٹنس اور دیگر کوڈ 19 ہدایات کو مد نظر رکھتے ہوئے 74 واں یوم آزادی منایا گیا ۔
تقریب یونیورسٹی کے ڈاکٹر ایم اے۔انصاری آڈیٹوریم کے لان میں منعقد کی گئی تھی جہاں اساتذہ ، نان ٹیچنگ اسٹاف اور جامعہ سینئر سیکنڈری اسکول کے سینئر کلاسوں کے چند طلباء ہی شامل ہو سکے تھے ، ایسا وبائی مرض کی وجہ سے کیا گیا تھا ۔
صبح 9 بجے قومی پرچم لہرایا گیا ساتھ ہی ساتھ قومی نغمہ بھی پڑھا گیا ۔ ایک مختصر سا ثقافتی پروگرام بھی منعقد ہوا جہاں طلباء نے حب الوطنی سے سرشار نغمے گائے اور تقریریں کیں۔
جامعہ سینئر سیکنڈری اسکول کے پرنسپل ڈاکٹر عتیق الرحمان نے تمام مہمانوں کا استقبال کیا۔
اگرچہ کوویڈ 19 کی وجہ سے یہ تقریب چھوٹی تھی لیکن پھر بھی یونیورسٹی کے احاطے میں غبارے ، ترنگا، اورپھولوں کے ساتھ ایک تہوار جیسا منظر تھا۔
وائس چانسلر پروفیسرنجمہ اختر اور رجسٹرار مسٹراے پی صدیقی (آئی پی ایس) نے سب کو یوم آزادی کی مبارکباد دی۔
پروفیسر نجمہ اختر نے کہا کہ آزادی ملک کے عظیم سپوتوں کی عظیم قربانیوں کے ذریعہ حاصل ہوئی، جس میں گاندھی جی نے اہم کردار ادا کیا تھا ۔ جامعہ ملیہ اسلامیہ عدم تعاون کی تحریک کی گود میں پیدا ہوئی تھی اور اس کے بانیوں نے ملک کی آزادی کے لئے سخت جدوجہد کی آج اس بات کی ضرورت ہے کہ ہم بھی خود کو اپنی قوم کی خدمت کے لئے وقف کر دیں ۔
انہوں نے جامعہ برادری کو بھی مبارکباد پیش کی جن کی کوششوں کی وجہ سے تمام مرکزی یونیورسٹیوں میں جامعہ نے نمایاں کار کر دگی انجام دی ۔ انہوں نے کہا کہ ہمیں نہ صرف اس عظمت کو برقرار رکھنے کی کوشش کرنی چاہئے بلکہ آنے والے سالوں میں بھی اعلی مقاصد کو حاصل کرنے کے لئے کوشاں رہنا چاہئے۔
مسٹر اے پی صدیقی نے کہا کہ یہ ہم سب کے لئے خوش بختی کی بات ہے کہ ہماری یونیورسٹی کو ایک قابل خاتون وائس چانسلر اور ایک بہترین ایڈمنسٹریٹر میسر ہے جو یونیورسٹی کو نئی بلندیوں کی طرف لے جا رہی ہیں اور اسے مضبوطی فراہم کر رہی ہیں ۔