وزیر اعلیٰ نے گورکھپور ضلع کے گیڈا میں 143.69 کروڑ روپے مالیت کے منصوبوں کا افتتاح اور سنگ بنیاد رکھا
ان میں سے تقریباً 67.86 کروڑ روپے کی لاگت کے پروجیکٹ عوام کو معنون کئے
75.83 کروڑ روپے کے پروجیکٹوں کا سنگ بنیاد رکھا گیا۔
لکھنؤ:
اتر پردیش کے وزیر اعلی یوگی آدتیہ ناتھ نے آج گورکھپور ضلع کے گیڈا آفس میں منعقدہ ایک پروگرام میں 143.69 کروڑ روپے کے پروجیکٹوں کا افتتاح اور سنگ بنیاد رکھا۔ ان پروجیکٹوں میں تقریباً 67.86 کروڑ روپے کے پروجیکٹوکا افتتاح کرتے ہوئے انہیں عوام کو معنون کیا گیا اور 75.83 کروڑ روپے کی لاگت کے پروجیکٹوں کے سنگ بنیاد رکھے گئے۔ انہوں نے سرمایہ کاری کے 06 نئے منصوبوں کے لیے مختص کی گئی 45.5 ایکڑ اراضی کے الاٹمنٹ لیٹر مختلف تاجرافراد کے حوالے کیے۔ اس کے علاوہ ’گارمنٹس کلسٹر‘ کے 56 پلاٹ کے الاٹیوں کو الاٹمنٹ لیٹر بھی دئیے۔
وزیر اعلیٰ نے کہا کہ یہاں مختلف پروجیکٹوں کے افتتاح اور سنگ بنیاد کے ساتھ ساتھ ضلع گورکھپور سمیت مشرقی اتر پردیش کے نوجوانوں کو روزگار کے مواقع فراہم کرنے کے لیے وسیع پیمانے پر سرمایہ کاری اور زمین کی الاٹمنٹ کا پروگرام منعقد کیا گیا ہے۔ ان ترقیاتی منصوبوں کے ذریعہ 1000 کروڑ روپے کی سرمایہ کاری کی جائے گی۔ اس سے 2500 سے زائد نوجوانوں کو روزگار کے مواقع میسر آئیں گے۔ انہوں نے کہا کہ یہ گورکھپور ضلع کے لئے ایک اہم پروگرام ہے۔ اس میں سرمایہ کاری کے لیے متعدد یونٹوں کو زمین الاٹ کرنے کا کام بھی کیاگیا۔
وزیر اعلیٰ نے کہا کہ وزیر اعظم جناب نریندر مودی نے سال 2024 تک ملک کی معیشت کو 5 ٹریلین ڈالر بنانے کا ہدف مقرر کیا ہے۔ اتر پردیش ملک کی سب سے زیادہ آبادی والی ریاست ہے۔ وزیر اعظم کی توقعات کے مطابق، اتر پردیش اپنی معیشت کو نئی بلندیوں پر لے جانے میں کامیاب ہو سکتا ہے، اس کے لیے سرمایہ کاری کے امکانات کو آگے بڑھانے کے لیے ہم سب کو مل کر کوششیں کرنی ہوں گی۔ سرمایہ کاری کی بنیادی شرط سلامتی اور امن و امان کی اچھی صورتحال ہے۔ ریاست کی معیشت میں تیز رفتار ترقی ملک میں ایک مثال کے طور پر قائم ہو رہی ہے۔ پچھلے پانچ سال میں ریاست میں ہر شہری کے تحفظ کو یقینی بنانے اور ریاست میں امن و امان کی صورتحال کو برقرار رکھنے کے لیے جو اقدامات کیے گئے ہیں، اس کے متوقع نتائج پورے ملک کے سامنے آرہے ہیں۔
وزیر اعلیٰ نے کہا کہ کوئی بھی اپنا ایمان کسی پر مسلط نہیں کر سکتا۔ اس لیے ریاستی حکومت نے فیصلہ کیا کہ کسی بھی مذہبی مقام پر اس کے احاطے سے مائیک کی آواز نہیں نکلنی چاہیے۔ اس کے نتیجے میں ریاست میں ایک لاکھ سے زیادہ لاؤڈ اسپیکر یا تو مذہبی عمارتوں سے نیچے آ گئے ہیں یا ان کی آواز دھیمی ہو کر اپنے احاطے تک محدود ہو گئی ہے۔ اس سے ظاہر ہوتا ہے کہ اتر پردیش ایک نئی چمک کے ساتھ ترقی کی نئی بلندیوں کو چھونے کے لیے تیار ہے۔ انہوں نے کہا کہ عوامی نمائندوں، انتظامیہ اور ریاست کے 25 کروڑ عوام کے تعاون سے وزیر اعظم کی منشا کے مطابق ریاست کی معیشت کو ایک ٹریلین ڈالر بنانے میں زیادہ دیر نہیں لگے گی۔
وزیر اعلیٰ نے کہا کہ گورکھپور ترقی کی نئی کہانی لکھ رہا ہے۔ پوروانچل ایکسپریس وے کا لنک وے گیڈا میں گورکھپور کو جیت پور سے جوڑ رہا ہے۔ مختلف جگہوں پر صنعتی کلسٹر قائم کیے جا رہے ہیں تاکہ یہ یقینی بنایا جا سکے کہ مشرقی اتر پردیش کے نوجوانوں کو نوکری یا روزگار کے لیے ریاست سے باہر نہ جانا پڑے، بلکہ وہ اپنے علاقے، اپنے ضلع میں نوکری یا روزگار حاصل کر سکیں۔
وزیر اعلیٰ نے کہا کہ اس وقت جی آئی ڈی اے کو صنعتوں کے قیام کے لیے بہت سی تجاویز موصول ہو رہی ہیں۔جی آئی ڈی اے 40 سال پہلے قائم ہوا تھا لیکن ترقی کا آغاز ہماری حکومت نے کیا۔ آج گورکھپور سے مافیا کا صفایا ہو چکا ہے۔ یہاں مافیا کا خاتمہ کرکے امن و امان کی حکمرانی قائم کی گئی ہے۔ بنیادی سہولیات سے متعلق شکایات کا ازالہ کیا گیا ہے۔ یہاں ’گارمنٹس کلسٹر‘ کے ساتھ فلیٹڈ فیکٹری کا جدید استعمال بھی کیا جا رہا ہے۔ تمام کاروباری حضرات فلیٹ شدہ فیکٹری میں ایک جگہ پر اپنا کاروبار قائم کر سکیں گے۔ اس سے ہزاروں نوجوانوں اور خواتین کو روزگار ملے گا۔ یہاں کی توانائی اور سرمایہ کو اب یہاں استعمال کیا جا سکتا ہے۔ گیڈا میں پلاسٹک پارک کا منصوبہ زمینی شکل اختیار کرنے جا رہا ہے۔ آئی ٹی پارک کے لیے زمین الاٹمنٹ کا کام آگے بڑھ گیا ہے۔
اس موقع پر ممبران پارلیمنٹ جناب روی کشن، جناب کملیش پاسوان،جناب جئے پرکاش نشاد، گورکھپور کے میئر جناب سیتارام جیسوال اور دیگر عوامی نمائندے، انفراسٹرکچر اور صنعتی ترقی کے کمشنر جناب اروند کمار، ایڈیشنل چیف سکریٹری اطلاعات اور ایم ایس ایم ای جناب نونیت سہگل کے ساتھ۔ حکومت و انتظامیہ کے اعلیٰ افسران موجود تھے۔
٭٭٭٭٭٭٭٭٭٭٭
,
